New version available here: vedabase.io

Bg 2.48

யோக-ஸ்த: குரு கர்மாணி
ஸங்கம் த்யக்த்வா தனஞ்ஜய
ஸித்த்ய-ஸித்த்யோ: ஸமோ பூத்வா
ஸமத்வம் யோக உச்யதே
Synonyms: 
யோகஸ்த — யோகத்தில் நிலைபெற்று; குரு — செயலாற்று; கர்மாணி — உன்னுடைய கடமைகள்; ஸங்கம் — பற்றுதல்; த்யக்த்வா — கைவிட்டு; தனஞ்ஜய — தனஞ்ஜயனே (அர்ஜுனனே); ஸித்தி-அஸித்த்யோ: — வெற்றி தோல்வியில்; ஸம — சமமாக; பூத்வா — ஆகி; ஸமத்வம் — சமத்துவம்; யோக: — யோகம்; உச்யதே — கூறப்படுகின்றது.
Translation: 
அர்ஜுனா, வெற்றி தோல்வியில் பற்றுதல் கொள்ளாமல், உனது கடமையை சமநிலையுடன் செய்வாயாக. இதுபோன்ற சமத்துவமே யோகம் என்று அழைக்கப்படுகிறது.
Purport: 

அர்ஜுனன், யோகத்தில் செயலாற்ற வேண்டுமென்று கிருஷ்ணர் கூறுகிறார். யோகம் என்றால் என்ன? யோகம் என்றால், எப்போதும் தொந்தரவு கொடுக்கும் புலன்களைக் கட்டுப்படுத்தி, மனதை முழுமுதற் கடவுளின் மீது நிலைநிறுத்துவதாகும். முழுமுதற் கடவுள் யார்? கிருஷ்ணரே முழுமுதற் கடவுள். அவரே போரிடச் சொல்லும்போது போரின் விளைவுகளில் அர்ஜுனன் செய்யக்கூடியது ஒன்றுமே இல்லை. வெற்றியோ தோல்வியோ, அஃது அவரைச் சேர்ந்தது. அவரின் கட்டளையை மட்டும் நிறைவேற்றுமாறு அர்ஜுனன் அறிவுறுத்தப்படுகிறான். அவரின் கட்டளைகளைப் பின்பற்றுவதே உண்மையான யோகம்—கிருஷ்ண உணர்வெனும் பயிற்சியில் இது பயிலப்படுகிறது. கிருஷ்ண உணர்வால் மட்டுமே 'தான் உரிமையாளன் ' என்ற உணர்வை விட்டொழிக்க முடியும். ஒருவன் கிருஷ்ணனின் தொண்டனாக ஆக வேண்டும், அல்லது கிருஷ்ணரின் தொண்டனுக்குத் தொண்டனாக ஆக வேண்டும். இதுவே கிருஷ்ண உணர்வில் முறையான கடமைகளைச் செய்யச் சரியான வழி. யோகத்தில் செயலாற்ற இது மட்டுமே உதவும்.

சத்திரியனான அர்ஜுனன், வர்ணாஷ்ரம தர்மத்தைச் சேர்ந்தவன். விஷ்ணு புராணத்தில் வர்ணாஷ்ரம தர்மத்தின் முழு நோக்கமும் விஷ்ணுவை திருப்திப்படுத்துவதே என்று கூறப்பட்டுள்ளது. தன்னையே திருப்தி செய்து கொள்ளுதல் என்னும் ஜடவுலக விதியை மீறி, கிருஷ்ணரைத் திருப்தி செய்ய வேண்டும். கிருஷ்ணரைத் திருப்தி செய்யாவிடில், வர்ணாஷ்ரம தர்மத்தின் கொள்கைகளை ஒருவன் முறையாகக் கடைபிடிக்க முடியாது. எனவே, கிருஷ்ணரின் வார்த்தைப்படி செயல்படுமாறு அர்ஜுனன் மறைமுகமாக இங்கு அறிவுறுத்தப்படுகிறான்.