New version available here: vedabase.io

Bg 14.7

ரஜோ ராகாத்மகம் வித்தி
த்ருஷ்ணா-ஸங்க ஸமுத்பவம்
தன் நிபத்னாதி கௌந்தேய
கர்ம-ஸங்கேன தேஹினம்
Synonyms: 
ரஜ — ரஜோ குணம்; ராக-ஆத்மகம் — ஆசை, அல்லது காமத்தினால் பிறந்த; வித்தி — அறிவாய்; த்ருஷ்ணா — ஏக்கத்துடன்; ஸங்க — தொடர்பு; ஸமுத்பவம் — உண்டானது; தத் — அது; நிபத்னாதி — பந்தப்படுத்துகிறது; கௌந்தேய — குந்தியின் மகனே; கர்ம-ஸங்கேன — பலன்நோக்குச் செயலின் தொடர்பினால்; தேஹினம் — உடலையுடையவன்.
Translation: 
குந்தியின் மகனே, எல்லையற்ற ஆசையாலும் ஏக்கத்தாலும் பிறந்த ரஜோ குணத்தின் காரணத்தினால், உடலையுடைய உயிர்வாழி, பௌதிக பலன்நோக்குச் செயல்களால் பந்தப்படுகின்றான்.
Purport: 

ஆணுக்கும் பெண்ணுக்கும் இடையிலுள்ள கவர்ச்சியில் ரஜோ குணத்தின் தன்மை வெளிப்படுகிறது. பெண்ணிடம் ஆணுக்கும், ஆணிடம் பெண்ணுக்கும் கவர்ச்சி இருக்கின்றது. இதுவே ரஜோ குணம் என்று அழைக்கப்படுகின்றது. ரஜோ குணம் அதிகரிக்கும்போது, ஜட சுகத்திற்கான ஏக்கத்தை ஒருவன் வளர்த்துக் கொள்கிறான். அவன் புலனின்பத்தை அனுபவிக்க விரும்புகின்றான். புலனுகர்ச்சிக்காக, ரஜோ குணத்தில் இருக்கும் மனிதன், சமூகத்திலோ தேசத்திலோ சற்று அந்தஸ்தை விரும்புகின்றான், மேலும், நல்ல வீடு, மனைவி, குழந்தைகளுடன் அவன் ஒரு மகிழ்ச்சியான குடும்பத்தைப் பெற விரும்புகின்றான். இவையனைத்தும் ரஜோ குணத்தின் படைப்புகள். இந்த விஷயங்களில் ஏக்கமுற்று இருக்கும் வரை, ஒருவன் மிகவும் கடினமாக உழைக்க வேண்டும். எனவே, அவன் தனது செயல்களின் பலன்களில் தொடர்பு கொள்கின்றான் என்றும், இவ்வாறாக அச்செயல்களால் பந்தப்படுகின்றான் என்றும் இங்கே தெளிவாகக் கூறப்பட்டுள்ளது. தனது மனைவி, குழந்தைகள், மற்றும் சமூகத்தைத் திருப்திப்படுத்துவதற்காகவும், தனது கௌரவத்தைப் பாதுகாத்துக் கொள்வதற்காகவும், அவன் உழைக்க வேண்டும். எனவே, ஜடவுலகம் முழுவதும் ஏறக்குறைய ரஜோ குணத்தில் தான் இருக்கின்றது. ரஜோ குணத்தின் தரத்தில், நவீன நாகரிகம் முன்னேறியுள்ளதாக கருதப்படுகிறது. முன்பெல்லாம், ஸத்வ குணத்தில் இருப்பது முன்னேற்றமடைந்த நிலையாக கருதப்பட்டு வந்தது. ஸத்வ குணத்தில் இருப்பவர்களுக்கே முக்தி இல்லை என்றால், ரஜோ குணத்தில் பந்தப்பட்டிருப்பவர்களைப் பற்றி என்ன சொல்வது?