Bg 13.19

இதி க்ஷேத்ரம் ததா க்ஞானம்
க்ஞேயம் சோக்தம் ஸமாஸத:
மத்-பக்த ஏதத் விக்ஞாய
மத்-பாவாயோபபத்யதே
Synonyms: 
இதி — இவ்வாறு; க்ஷேத்ரம் — செயல்களின் களம் (உடல்); ததா — கூட; க்ஞானம் — அறிவு; க்ஞேயம் — அறியப்படும் பொருள்; — மேலும்; உக்தம்-விவரிக்கப்பட்டுள்ளது. — ஸமாஸத:—சுருக்கமாக; மத்-பக்த: — எனது பக்தன்; ஏதத் — இவற்றையெல்லாம்; விக்ஞாய — புரிந்து கொண்ட பின்; மத்-பாவாய — என் இயற்கையை; உபபத்யதே — அடைகின்றான்.
Translation: 
இவ்வாறாக, செயல்களின் களம் (உடல், க்ஷேத்ர), அறிவு (க்ஞானம்), அறியப்படும் பொருள் (க்ஞேயம்), ஆகியவை சுருக்கமாக என்னால் விவரிக்கப்பட்டன. எனது பக்தர்கள் மட்டுமே இவற்றை முழுமையாகப் புரிந்து கொண்டு, எனது இயற்கையை அடைய முடியும்.
Purport: 

உடல், அறிவு, அறியப்படும் பொருள் ஆகியவற்றைப் பற்றி பகவான் சுருக்கமாக விவரித்துவிட்டார். இந்த அறிவு மூன்று விஷயங்களைப் பற்றியது: அறிபவன், அறியப்படக் கூடியது, அறிவதற்கான வழிமுறை. இம்மூன்றும் இணைந்து விஞ்ஞான, ஞானத்தைப் பெறுவதற்கான அறிவியல் என்று அழைக்கப்படுகின்றது. பகவானின் களங்கமற்ற பக்தர்களால் பக்குவமான ஞானத்தினை நேரடியாகப் புரிந்து கொள்ள முடியும். மற்றவர்களால் புரிந்து கொள்ள முடியாது. இறுதி நிலையில் இம்மூன்றும் ஒன்றாகிவிடுகின்றன என்று ஒருமைவாதிகள் கூறுகின்றனர். ஆனால் பக்தர்கள் இதனை ஏற்பதில்லை. ஞானம், ஞானத்தை வளர்ப்பது என்றால், ஒருவன் தன்னை கிருஷ்ண உணர்வில் புரிந்து கொள்வது என்று பொருள். நாம் ஜட உணர்வினால் வழிநடத்தப்படுகின்றோம், ஆனால் நமது உணர்வுகள் அனைத்தையும் கிருஷ்ணரது செயல்களுக்கு மாற்றி, கிருஷ்ணரே எல்லாம் என்பதை உணர்ந்த பின்னர், நாம் உண்மையான ஞானத்தை அடைகின்றோம். வேறு விதமாகக் கூறினால், ஞானம் என்பது, பக்தித் தொண்டைப் பக்குவமாகப் புரிந்து கொள்வதன் ஆரம்ப நிலையேயன்றி வேறு ஒன்றுமல்ல. பதினைந்தாம் அத்தியாயத்தில் இது மிகவும் தெளிவாக விளக்கப்படும்.

தற்போது சுருக்கமாகப் பார்த்தால், மஹா-பூதானி என்று தொடங்கி சேதனா த்ருதி: என்று முடியும் ஆறாவது மற்றும் ஏழாவது பதங்கள், பௌதிக மூலக்கூறுகளையும், வாழ்வின் அறிகுறிகளின் சில தோற்றத்தைப் பற்றியும் ஆராய்ந்தன என்று நாம் புரிந்து கொள்ளலாம். இவை இணைந்து உடலை, அல்லது செயல்களின் களத்தை உருவாக்குகின்றன. பதங்கள் 8 முதல் 12 வரை, அமானித்வம் முதல் தத்த்வ-க்ஞானார்த-தர்ஷனம் வரை, களத்தை அறியும் இரண்டு வித நபர்களான ஆத்மா, பரமாத்மாவினை புரிந்து கொள்வதற்கான ஞானத்தின் வழிமுறை விவரிக்கப்பட்டது. பின்னர் பதங்கள் 13 முதல் 18 வரை, அனாதி மத்-பரம் என்பது முதல் ஸ்ருதி ஸர்வஸ்ய விஷ்டிதம் வரை, ஆத்மாவையும், பரமாத்மாவையும் (முழுமுதற்கடவுளை) விளக்குகின்றன.

இவ்வாறாக, மூன்று விஷயங்கள் இதுவரை விளக்கப்பட்டள்ளன: செயல்களின் களம் (உடல்), புரிந்து கொள்வதற்கான வழிமுறை, மற்றும் ஆத்மாவும் பரமாத்மாவும். களங்கமற்ற பக்தர்கள் மட்டுமே இந்த மூன்று விஷயங்களைத் தெளிவாகப் புரிந்து கொள்ள முடியும் என்று இங்கு குறிப்பாக விளக்கப்பட்டுள்ளது. எனவே, பகவத் கீதை தனது முழுமையான பலனை பக்தர்களுக்கு கொடுக்கும்; அவர்களால் மட்டுமே உன்னத இலக்கான முழுமுதற் கடவுள் கிருஷ்ணரின் இயற்கையை அடைய முடியும். வேறு விதமாகக் கூறினால், பக்தர்கள் மட்டுமே பகவத் கீதையை புரிந்து கொண்டு விரும்பும் பலனை அடைய முடியும்.