Bg 11.45

அத்ருஷ்ட-பூர்வம் ஹ்ருஷிதோ (அ)ஸ்மி த்ருஷ்ட்வா
பயேன ச ப்ரவ்யதிதம் மனோ மே
தத் ஏவ மே தர்ஷய தேவ ரூபம்
ப்ரஸீத தேவேஷ ஜகன்–நிவாஸ
Synonyms: 
அத்ருஷ்ட-பூர்வம் — இதற்கு முன்பு காணாத; ஹ்ருஷித: — மனமகிழ்ந்து; அஸ்மி — நான்; த்ருஷ்ட்வா — பார்த்து; பயேன — பயத்தால்; — மேலும்; ப்ரவ்யதிதம் — குழம்பி; மன: — மனம்; மே — எனது; தத் — அந்த; ஏவ — நிச்சயமாக; மே — எனக்கு; தர்ஷய — காண்பிக்கவும்; தேவ — இறைவனே; ரூபம் — உருவம்; ப்ரஸீத — கருணை கொள்ளும்; தேவ-ஈஷ — தேவர்களின் இறைவனே; ஜகத்-நிவாஸ — அகிலத்தின் அடைக்கலமே.
Translation: 
இதுவரை நான் என்றுமே கண்டிராத விஸ்வரூபத்தைப் பார்த்த பிறகு, நான் மிகவும் மகிழ்ச்சியடைகிறேன், ஆனால் அதே சமயத்தில் பயத்தினால் எனது மனம் குழம்புகின்றது. எனவே, தேவர்களின் இறைவனே, அகிலத்தின் அடைக்கலமே, ஏன் மீது கருணைக் காட்டி மீண்டும் தங்களது தெய்வீக ரூபத்தைக் காட்டி அருள்புரிவீராக.
Purport: 

அர்ஜுனன் எப்போதும் கிருஷ்ணருடன் நெருக்கமான உள்ளான்; ஏனெனில், அவன் அவருக்கு மிகவும் பிரியமான நண்பன். மேலும், ஒரு பிரியமான நண்பன் தனது நண்பனின் வைபவத்தைக் கண்டு மனம் மகிழ்வதுபோல, தனது நண்பரான கிருஷ்ணரே பரம புருஷ பகவான் என்பதிலும், அவரால் இத்தகு அற்புதமான விஸ்வரூபத்தைக் காட்ட முடியும் என்பதிலும் அர்ஜுனன் மிகவும் மகிழ்ச்சியுற்றான். ஆனால் அதே சமயத்தில், அந்த விஸ்வருபத்தைப் பார்த்த பின்னர் தனது களங்கமற்ற நட்பினால் கிருஷ்ணருக்கு பற்பல அபராதங்களைத் தான் இழைத்துவிட்டதாக பயப்படுகின்றான். அத்தகு பயத்திற்கு காரணம் ஏதும் இல்லை என்றபோதிலும், அவனது மனம் பயத்தால் குழம்பியுள்ளது. எனவே, நாரயண ரூபத்தைக் காட்டும்படி அர்ஜுனன் கிருஷ்ணரிடம் வேண்டுகிறான், ஏனெனில் அவரால் எந்த ரூபத்தையும் எடுக்க முடியும். இந்த பௌதிக உலகம் எவ்வாறு தற்காலிகமானதோ, அவ்வாறே இந்த விஸ்வரூபமும் பௌதிகமானதும் தற்காலிகமானதும் ஆகும். ஆனால் வைகுண்ட லோகங்களில் அவர் தனது தெய்வீக ரூபத்தில் நான்கு கரங்களுடன் நாராயணராக விளங்குகிறார். ஆன்மீக வானில் எண்ணற்ற லோகங்கள் இருக்கின்றன, கிருஷ்ணர் தனது விரிவங்கத்தின் மூலம் அவை ஒவ்வொன்றிலும் வெவ்வேறு பெயர்களுடன் வீற்றுள்ளார். இவ்வாறாக வைகுண்ட லோகங்களில் தோன்றியுள்ள ரூபங்களில் ஒன்றினைக் காண அர்ஜுனன் விருப்பப்பட்டான். ஒவ்வொரு வைகுண்ட லோகத்திலும் நாராயணரின் ரூபம் நான்கு கரங்களுடன் உள்ள போதிலும், அந்த நான்கு கரங்களில், சங்கு, சக்கரம், கதை, மற்றும் தாமரையை அவர் தாங்கியுள்ள விதம் வேறுபடுகின்றது. இந்த நான்கு சின்னங்களை நான்கு கரங்களில் வைத்திருப்பதன் அடிப்படையில், நாராயணருக்கு வெவ்வேறு பெயர்கள் உள்ளன. இந்த ரூபங்களுக்கும் கிருஷ்ணருக்கும் வேறுபாடில்லை என்பதால், நான்கு கரங்களையுடைய ரூபத்தைக் காட்டுமாறு அர்ஜுனன் வேண்டுகிறான்.